الصراحة الموضوع ده عمال يلف في دماغي بقاله فترة و عايز أتكلم عليه,البلد... بلدنا ...مصر ..الوطن ..أعتقد أنها كلمات كلها بتحرك جوانا مشاعر حتي و لو مشاعرنا ديه بقت مش مجرد فخر و حب و أعتزاز لاء كمان شوية حزن و عتاب ...يا تري الوطن هو الأرض و لا الناس و لا الذكريات و لا كلهم مع بعض؟ بيتهيالي كلهم مع بعض .
و لكن أيه الي حصل لنا كلنا عايزين نسافر كلنا-يعني أنا كمان- عايزين نسيبها و نمشي طب ليه ؟
علشان مفيش شغل كويس في بلدنا و لا علشان مفيش فلوس و لا علشان نهرب من ذكريات أليمه و لا علشان أتظلمنا منها مرة أو مرتين ...لاء بلدنا ما بتظلمش و لا بتأسى علي ولادها ...بلدنا مظلومة زينا بالظبط و أحنا الي ظلمنا نفسينا مش حد تاني .
لما فكرت في الموضوع لقيت المشاكل كلها سببها أحنا ..يعني الفكر الجامد المحجر الي بيدير أي شغل مهو ده أحنا ,المستثمر الي بيدفع بالملليم للموظفين و بالملاين علشان ينزه نفسه و لا رشاوي مهو ده واحد مننا ...الوسايط ..مين الي عاملها مش أحنا الي بنجري علي فلان و لا علان أول ما نتخرج علشان يشغلنا..حتى الرشاوى مهو أحنا الي بدعناها علشان نبين أن أحنا معانا أو بدل ما نقف في الطابور أدفع علشان تمشي بدري ..لحد ما الموظف بقى الي ما يدفعش مش هيقضيله مصلحته...بلاش مين الي بيسكت علي الباقي بتاعة في المواصلات و لا لما الاسعار تزيد يقول و ماله ...و لا مين الي بيلاقي الميكروباص زحمة و يركب علشان يلحق لحد ما السواق أعتبر ان العربية مش كاملة غير لما ما يبقاش في خرم أبره حد مقرفص او واقف فيه ..مهو أحنا برده و من غير ما أكمل ..
يعنى أنتم عرفين الباقي و بعد ده كله عايزين نسيب البلد. و لما نطلع بره نتعلم الأدب و نبقى بنشتغل بضمير و ما بنكسرش أشارة المرور و غيره...
طيب أيه الحل ...الحل فينا و بأيدينا بجد ...الموضوع مش مستحيل بس تعالوا بدل ما بنحت الصخر برة و بنغسل صحون و نتعلم و نبقى معجزة من معجزات الزمن و قصة كفاح نقعد نحكيها لبعض لا تعالوا نبدأ هنا
مع الأعتذار للدكتور زويل احنا مش عايزين علماء ياخدوا نوبل و احنا مش فاهمين هما خدوها ليه و في أيه....ده الي بيعلم واحد و يمحوا أميته ..مش بس أمية القراية و الكتابة لا أمية التفكير الي هتكلم عليها في موضوع تاني لوحدوا أنفع لبلدنا من مليون نوبل ...أحنا عايزين كل أيد تقدر تعمل حاجه تعملها و كل حد يقدر يغير للأحسن
أحنا عايزين نغير من نفسينا و سلوكنا و نغير في الي حولينا
و الله البلد ديه محتاجنا و لا أيه؟؟!! هي ديه مش بلدنا برده
